Një vit nga vdekja e kolegut tonë Bashkim Svirca

Ai ishte shumë i dashur për të gjithë dhe tejet i përkushtuar për t’iu shërbyer njerëzve në nevojë duke mos kursyer asgjë nga vetja e tij për këdo që mund të kishte ndonjë nevojë, brengë apo hall çfarëdo qoftë ai.

Bashkimi e filloi rrugëtimin e tij në Islamic Relief Kosova më 2004, për t’u rekrutuar pastaj nga zyra qendrore e Islamic Relief Worldwide në vitin 2010, duke iu bashkuar Departamentit të Teknologjisë, Informacionit dhe Komunikimit (TIK). Ai përfaqësoi denjësisht vlerat e organizatës, derisa profesionalizmi i tij e çoi atë thuajse në të gjitha shtetet ku operon Islamic Releif Worldwide, duke shkëlqyer në çdo aspekt të punës së tij. Veçanërisht ai njihet për zhvillimin e sistemit financiar AX, sistemit të burimeve njerëzore (HR) si dhe funksionalizimin e ‘Multi Factor Authentication’ dhe ‘Microsoft Teams’, të cilat vazhdojnë të përdoren edhe sot e kësaj dite në zyret e Islamic Relief në më shumë se 30 vende të botës.

Vëlla Bashkimi ishte një pasuri për departamentin e TIK-ut, dhe për këtë organizatë të madhe. “Ai gjithmonë iu jepte përparësi të tjerëve duke i vënë ata në plan të parë – një individ vetëmohues që gjithmonë iu ikte lavdërimeve”, shprehen kolegët dhe udhëheqësit e organizatës.

Islamic Relief ka humbur një nga njerëzit më me vlerë të organizatës, por megjithatë ai ka lënë pas një trashëgimi të madhe punësh e vlerash. Andaj ne shpresojmë në Allahun që të gjitha të mirat të cilat i ka vepruar dhe rrënjosur me punën e tij, shpërblimet do të vazhdojnë t’i shumëfishohen atij deri në Ditën e Gjykimit.

Bashkimi vdiq më 17 janar 2021 pas një sëmundjeje 1 vjeçare.

Ju lutemi, vazhdoni të bëni dua për Bashkimin dhe familjen e tij të shtrenjtë!